Rusiye prezidenti Vladimir Putin Rusiye ordusı tarafından işğal etilgen Donetsk, Herson, Lugansk ve Zaporijjâ vilâyetlerini Rusiyege qabul etüv añlaşmalarını imzalay, dep ilân etti.
«Millionlarnen insannıñ iradesidir», – dep ayttı Putin Kremlde çıqışta bulunıp.
Kremlde Rusiye qoltutqan «DNR» ve «LNR» gruppirovkaları, Herson ve Zaporijjâ vilâyetleriniñ işğalci memuriyet yolbaşçıları buluna. Olar da añlaşmalarnı imzalamaq kerekler.
Georgiy salonında deputatlar ve Federatsiya Şurasınıñ azaları, üyken memurlar, regionlarnıñ yolbaşçıları, kütleviy haber vastalarınıñ vekilleri toplaştı, dep haber ete Azatlıq Radiosınıñ Rus hızmeti.
İlhaq esnası kelecek afta bitecektir. Ukrayına öz topraqlarını azat etme kiçün küreşecek, Rusiye akimiyeti olarnı Rusiyeniñ bir qısmı dep saysa da, bir şey deñişmeycek.
Rusiye prezidenti Vladimir Putin Ukrayınanıñ Herson ve Zaporijjâ vilâyetleriniñ sahte mustaqilligi ve suverenitetini tanığanına dairfermanlarnı imzaladı. Bu Ukrayına regionlarınıñ büyük qısmı Rusiye ordusı tarafından işğal etildi.
Putin çıqarğan buyruqlarında «halqara uquq temellerine» ve sentâbrniñ 23-27-nde işğal etilgen Ukrayına topraqlarında keçirilgen sahte referendumlarnıñ neticelerine esaslana.
Ukrayına ve bir çoq memleket bu rey berüvlerni sahte ve qanunsız dep adlandırıp, çünki olar işğal ve cenk uruşları şaraitlerinde milliy qanunlarğa ve halqara uquqqa zıt bir şekilde keçirildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
