Qırımda yañı “Tavrida” yolunıñ Aqmescitten (Simferopol) Qarasuvbazarğace (Belogorsk) qısmını açtılar dep dekabr 29-ında Qırım matbuatı bildire.
“Krıminform” malümatına köre, Aqmescitten ketken naqliyat Qarasuvbazardan soñ eski trassağa yollanılacaq.
Dekabr 30-ında yol areketi içün “Tavrida” yolunıñ daa eki qısmını - Qarasuvbazardan Kefegece (Feodosiya) - açmağa niyetlenile. Dekabr 31-inde Kefeden Keriçke yol açılacaq.
Böylece, yılnıñ soñunace “Tavrida”nıñ Keriçten Aqmescitkece 190 kilometrlik yol qısmını (qurulışnıñ birinci basamağı) açmağa niyetleneler. Yañı trassanıñ eki yolağı olacaq.
Qırımda “Tavrida” avtomobil yolunıñ qurulışı başlanuvı aqqında 2017 senesi mayıs ayında ilân ettiler. Qurulışnı 2018 senesi bitirecek ediler, amma Rusiye nezaretindeki Qırım avtomobil yolları Hızmetiniñ başı Aleksandr Mohna, müddet eki yılğa uzatılğanını bildirdi.
