20 yıl apis cezasına mahküm etilgen qırımtatar Ansar Osmanovnı 2-nci Vladimir apishanesine etap ettiler. Bu aqta "Qırım birdemligine" onıñ qadını Meryem Osmanova bildirdi.
Onıñ aytqanına köre, aqayından ilk mektüpni tek üç afta soñ alğan, onıñ bulunğan yeri aqqında bir türlü malümat da yoq.
"Çoq vaqıt, çeçek ayınıñ 21-nden [quralaynıñ 16-na qadar] bir türlü malümat yoq edi. Men mektüp yazdım ve olarğa telefon ettim, olar resmiy muracaatqa atıf etip, cevap bereceklerini ayttılar", — dep ayttı qırımtatarnıñ apayı.
Ansar Osmanov "Qırım birdemligi" areketiniñ faal iştirakçisi edi ve siyasiy basqılarnen bağlı davalar boyunca mahkeme oturışlarında sıq-sıq iştirak ete edi.
Osmanov 2022 senesi kiçik ayda Rusiye tintüvlerinden soñ apiske alındı. O vaqıt Qırımnıñ bir qaç rayonında Rusiye quvetçileri dört insannı yaqaladı: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlarnıñ episi Rusiyede terroristik dep tanılğan, lâkin dünyanıñ bir çoq memleketiniñ milliy qanunları seviyesinde sıñırlanmağan "Hizb ut-Tahrir" islâm siyasiy firqasında iştirak etkeninde qabaatlandı.
2023 senesi ilk yaz ayınıñ 16-nda Rostov-na-Donu Cenübiy okrugınıñ arbiy mahkemesi Ansar Osmanovnı 20 yılğa azatlıqtan marum etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
