Yaqın zamanda Mıkolayiv bir ya da eki künge "qapatılacaq", dep haber etti Mıkolayiv vilâyetiniñ arbiy memuriyetiniñ yolbaşçısı Vitaliy Kim.
"Mıkolayivniñ qapatıluvı aqqında. Bu, bir-eki aftadan soñ planlaştırıla. Şeerni bir ya da eki künde qapatacaqmız. Adamlar aş, suv satın almağa yetiştirmeleri ve areketlerini planlaştırıp olmaları içün bunıñ aqqında biz arbiyler ile birlikte evelden haber etermiz. Ve talil etecegimiz kerekli adreslerni baqıp çıqarmız", - dedi o.
Kimniñ haber etkenine köre, tünevinden berli mühtemelen kollaborantlar ve satqınlar aqqında 18 mektüp kelgen, al-azırda bu malümat teşkerilmekte.
Mıkolayiv ve şeer muntazam şekilde Rusiye ordusı tarafından ateşke tutıla. Evel bir qaç ukrayin şeerlerinde devamlı komendant saatları ilân etildi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
