Qırım memuriy sıñrında Ukraina Devlet sıñır hızmetiniñ Herson bölüminiñ sıñırcıları, Volkswagen maşnasınen Qırımğa yol tutqan Odessa vilâyetiniñ sakinini tuttı. İnterpolnıñ malümatına köre, bu maşna 2018 senesi Odessada hırsızlanıp, halqara qıdıruvda buluna eken.
Fevralniñ 18-inde sıñırcı İvan Şevtsov bildirgeni kibi, vaqia “Kalançaq” kiriş-çıqış noqtasında yüz berdi.
Aydavcı maşnanen beraber uquq qoruyıcılarğa berildi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
