Link açıqlığı

Saatnıñ esas haberi

Qırımda Rusiye seferberligi devam ete, plan yerine ketirilmedi – Fesenko


Мобилизированные российские военные, иллюстрационное фото
Мобилизированные российские военные, иллюстрационное фото

Qırımda Rusiye qısmiy seferberligi planı yerine ketirile. Bu aqta Qırımnıñ Rusiye ükümeti seferberlik işi ve territorial mudafaa hızmetiniñ yolbaşçısı Viktor Fesenko «Krım 24» Rusiye devlet kanalına bildirdi.

«Daa yerine ketiremiz, az qaldı. Mence, tezden bitirecekmiz ve vatandaşlarğa kelgenleri ve hızmetke kelgenleri içün teşekkür bildirecekmiz», – dep bildirdi o.

Onıñ aytqanına köre, «vatandaşlarnıñ aq ve serbestligini bozuv meselelerini çezmek içün» arbiy komissiyalarnıñ ştatına Rusiye prokuraturasınıñ hadimleri kirecek.

Sentâbrniñ 25-nde Qırımnıñ Rusiye yolbaşçısı Sergey Aksenov Telegram kanalında «kün soñuna qadar Qırımda seferberlik tedbirleri yekünlenecek», dep yazdı. Sentâbrniñ 26-nda Qırımda seferberlik «aman-aman bitirildi», amma «bir qaç arbiy-esap zenaat az insannı ala».

«Krıminform» Rusiye devlet agentligi Qırımnıñ seferberlik işi ve territorial mudafaa hızmetiniñ yolbaşçısı Viktor Fesenkonıñ malümatına esaslanıp, yarımadadan ketmege istegen qırımlılar yaşağan yerinde Rusiye arbiy komissarlıqlarından izin almalı, dep bildirdi.

Ukrayına istihbaratı Qırım.Aqiqatqa bildirgenine köre, Rusiye quvetçileri arbiy komissarlıqtan izin almağan erkeklerni işğal etilgen Qırımdan çıqarmay. Yarımadanıñ Rusiye akimiyeti «Qırımdan çıqmaq yasaq degil», amma «celpname alğanlar arbiy komissarlıqlarğa acele kelmeli», dep bildire.

Sentâbrniñ 21-nde Rusiyede qısmiy seferberlik ilân etilgen soñ Qırım ve Aqyarnıñ Rusiye akimiyeti askerlikke aluv komissiyalarını quruv aqqında bildirdi. Aq qorçalayıcılarnıñ malümatına köre, 5 biñden çoq qırımlı celpname aldı. Aqyarnıñ Rusiye akimiyeti yedekte olğan tahminen 2 biñ kişi Rusiyege ant etti, dep bildirdi.

Ukrayına prezidentiniñ Qırım Muhtar Cumhuriyetindeki daimiy temsilcisi Tamila Taşeva Qırımda arbiy komissarlıqlar qırımtatarlar toplu yaşağan yerlerde kütleviy şekilde celpnameler bere, dep bildirdi. «Krım SOS» aq qorçalayıcı teşkilâtı qırımtatarlarnıñ seferberligi olarnıñ genotsidine yol aça bile, dep bildirdi.

Ukrayına prezidentiniñ Qırım Muhtar Cumhuriyetindeki temsilciligi Rusiye seferberligine oğrağan qırımlılar içün areket algoritmini derc etti. Rusiye ordusına çağırılmaqtan qurtulmağa istegenler içün «canlı destek» açıldı.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG