Kreml nezareti altındaki Aqmescitniñ Merkeziy rayon mahkemesi Bilâl Bilâlov davasını boyunca ilk oturışnı senâbrniñ 7-ne tayinledi. Qırımtatar akademik muzıkalı drama teatriniñ müdiri ve bediiy reberi Bilâl Bilâlov onıñ işten çıqarulıvına qarşı mahkemede dava açqan edi. Bu aqta sentâbrniñ 6-nda Bilalovnıñ özü Qırım.Aqıqatqa haber etti.
“Biz davanı endi açtıq. Yarın Aqmescitniñ Merkeziy rayon mahkemesinde saat 14:30 ilk mahkeme oturışı olacaq”, - dep haber etti Bilâlov.
Rusiyeli mahkemeniñ saytında haber etilgeni kibi, bu davada cevapkâr - Kreml nezareti altındaki Qırımnıñ Medeniyet Nazirligi.
Daa evel Bilâlov haber etkeni kibi, Qırımtatar akademik muzıkalı drama teatrinden 16 esas sanatkâr işten çıqtı.
Avgustnıñ 7-sinde işğal etilgen Qırımda Qırımtatar akademik muzıkalı drama teatriniñ bediiy reberi ve rejissöri, Ukrainada nam qazanğan sanaat erbabı Bilâl Bilâlov işten çıqarılğanı belli oldı. Teatrniñ kollektivi öz bediiy reberine qoltuttı.
Rejissör işten boşatılğanı içün mahkemege muracaat etecegini haber etken edi. Teatr taqımı yolbaşçısına bütünley qol tuttı. Oña qol tutqanı aqqında Qırımtatar Milliy Meclisiniñ reisi Refat Çubarov da aytqan edi.
Bilâlov Qırımtatar akademik muzıkalı drama teatrinde 1989 senesinden başlap çalıştı, 1994 senesi teatriniñ bediiy reberi ve müdiri oldı.
