Ukrayına ombudsmeni Dmıtro Lubinets Türkiye prezidenti Recep Tayyip Erdoğannen körüşip, qırımlı siyasiy mabüslerni Rusiye apsinden azat etüv meselesini muzakere etti. Bu aqta Ukrayına ombudsmeniniñ matbuat hızmeti haber ete.
«Erdoğan beynen körüşip, bir sıra müim meseleni muzakere ettik: Rusiye tarafından qanunsız tutulğan ve apiske alınğan ve olarnıñ fikirince Qırımda cinayet yapqan «Kreml reineleri» siyasiy mabüslerini azat etüv; 2014 senesinden başlap Rusiyede ve vaqtınca işğal etilgen Donetsk ve Lugansk vilâyetlerinde uzun apis cezalarını çekken Ukrayına vatandaşlarınıñ qaytarıluvı; 2022 senesi fevralniñ 24-nden başlap Rusiyede qanunsız tutulğan Ukrayına vatandaşlarınıñ qaytarıluvı», – dep aytıla haberde.
Onıñ bildirgenine köre, «Rusiye apishanelerinde tutulğan bütün vatandaş reineleri, Ukrayına vatandaşlarını evge qaytarmağa yardım etecek uquqiy mehanizmni tapmaq kerek, dep qayd etildi».
Lubinets Rusiye ombudsmeni Tatyana Moskalkovanen körüşti. Reuters agentligi Rusiye memurınıñ aytqanına esaslanıp, taraflar «40-qa 40» formulasına köre deñişüv aqqında añlaştı, dep bildirdi.
Ukrayınanıñ arbiy esirlerge munasebet koordinatsion merkeziniñ malümatına köre, 2022 senesi Rusiye esirliginden 1596 arbiy ve Ukrayına vatandaşı azat etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
