Lısıçansk sakinleri Ukrayına Silâlı quvetleriniñ arbiylerini kördi, dep bildirdi Luğansk vilâyeti arbiy memuriyetiniñ reisi Serğiy Ğayday.
«Bugün Luğansk vilâyetiniñ çoqusı sakini ve tahliye olmağa mecbur olğan er kesniñ pek yahşı künüdir. Bugün ilk sefer yerli sakinlerniñ Lısıçansk civarlarında Ukrayına Silâlı quvetlerini körgenine dair haber alıp başladıq, gece Kremennada partizanlar Ukrayına bayrağını köterdi», – dep ayttı Ğayday.
Öz Telegram kanalında o, Ukrayına Silâlı quvetleriniñ Baş ştabı da vaziyetni resmiy şekilde izaatlamalı, dep qoştı, «amma işğalcilerniñ bütün işğal etilgen şeerlerden qaçması doğru ola». Onıñ aytqanına köre, Rusiye ordusı tek fevralniñ 24-nden soñ işğal etilgen şeerlerden degil, 2014 senesinden soñ işğal altında olğan şeerlerden de kete.
Baş ştab bu malümatnı daa izaatlamadı, onı mustaqil menbalarda teşkermek şimdilik imkânsız ola.
Ukrayına arbiyleri Lısıçansknı iyülniñ 3-nde terk etti. Ukrayına Silâlı quvetleri askerlerini qorumaq içün mevzilerinden çetleşken edi.
Qanunsız qurulğan silâlı «DNR» birleşmesiniñ aydutları ve Rusiye arbiy mühbirleri cumaertesi künü Rusiye ordusı Harkiv vilâyetindeki İzüm şeerinden çıqa, dep bildirdi.
Cumaertesi künü Ukrayına ordusı İzüm, Kupyansknı ve Donetsk vilâyetindeki Limannı aldı, dep haber etildi. Bu aqta Rusiyege qoltutqan Telegram kanalları ve Ukrayına menbaları yazdı.
Ukrayına Silâlı quvetleriniñ Kupyansknı almasını Harkiv vilâyetiniñ memuriyet yolbaşçısı mesleatçısı Natalâ Popova tasdıqladı.
Ukrayına Silâlı quvetleri mahsus bölüginiñ Telegram kanalında Kupyansknıñ ilk fotoresimleri peyda oldı. Ukrayına komandanlığı Kupyansk azat etilgenini resmiy şekilde daa bildirmedi.
Ukrayına cenübi Mudafaa Quvetleriniñ Birleşken koordinatsion matbuat hızmetiniñ reberi Natalâ Ğumenük cumaertesi telemarafon vaqtında Ukrayına tek Harkiv vilâyetinde degil, cenüpte de muvafaqiyetli qarşı ücüm kerçekleştire, dep haber etti. «Ordumız cenübiy cebede ekiden bir qaç on kilometrge qadar çeşit yerlerde ileriley», – dep ayttı o.
Rusiye Mudafaa nazirligi Balakliya ve İzüm rayonlarında ordusı «ğayrıdan gruppalandı», dep ilân etti. Müessise spikeri İgor Konaşenkov «Donetsk yönelişinde quvetleriniñ arttırıluvı» aqqında ayttı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
