Kyivde PinchukArtCentre merkezinde ukrain rejissörı Oleg Sentsovnıñ “Gamer” (2011) filminiñ kösterilüvi keçirildi.
Kinokösterilüvniñ çerçivesinde seyirciler, 130 kün devamında açlıq tutqan Sentsovğa otkrıtka imzaladı.
Qırım.Aqiqat mühbiri haber etkeni kibi, odağa bütün istegenler sığıp olamadı, kösterilüvge 100-ge qadar adam keldi.
“Gamer” filmi Qırımda yaşağan ve kibersportnen oğraşqan gençniñ yaşayışı aqqında ikâye ete.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi. O, mayısnıñ 31-nde «onı deñiştirüv meraqlandırmağanı» bildirdi, çünki o «soñuna qadar baracaq insan olğanını» ilân etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatlarını tanımay.
«Memorial» insan aqlarını qorçalav merkezi Sentsov ve Kolçenkonı siyasiy mabüsler cedveline kirsetti.
