Sırbistanlı rejissör ve çalğıcı Emir Kusturitsa, The No Smoking Orchestra folk-rok-gruppasınıñ çalğıcıları ile beraber Çufut-Qale qobalar şeerinde improvizatsiya yolunen kontsert keçirdi. Bunı «Krım 24» telekanalı bildire.
Ondan ğayrı Kusturitsa Çufut-Qalede rekonstruktsiyanıñ keçirilmesini tevsiye etti.
Qobalar şeerini kezgen soñ o: «Bu yerde insanlarnıñ yaşayışı bar edi. Onı köstermek kerek. Tarihiy rekonstruktsiyanı keçirmek kerek», – dedi.
Sırbistanlı rejissör ve çalğıcı Emir Kusturitsa ağustos 22-de Yaltağa kontsert ile keldi.
Kusturitsa 2017 senesi iyül 23-te Qırımğa keldi ve «añlı surette Ukraina devlet sıñırınıñ bozuluvı; Rusiyeniñ tecavuzını red etüv; Qırımnıñ ilhaq etilmesiniñ qanuniyleştirilmesinde iştirak etüv ve yarımadanıñ territoriyasında qanusız gastrol faaliyeti» içün Ukrainadaki «Mirotvorets» saytınıñ bazasına kirsetildi.
Ondan evel Kusturitsa, Qırımda sanağa çıqqanı içün ihtimal ile özüne qarşı sanktsiyalarnıñ tatbiq etileceginden qorqmağanını bildirdi. O, Qırımnıñ Rusiye tarafından ilhaq etilmesiniñ tabiiy, «organik protsess» olğanını saya.
Qırım Rusiye tarafından ilhaq etilgen soñ ve Donbasstaki cenk vaqtında sırbistanlı kinorejissör, Kann festivaliniñ eki defa laureatı, çalğıcı Emir Kusturitsa defalarca Kremlniñ areketlerine qol tuttı. Buña cevaben Kyivde Kusturitsanıñ iştiraki ile konsertni lâğu ettiler.
Ecnebiy artistler Rusiye tarafından ilhaq etilgen Qırımğa Ukraina tarafından qapatılğan keçirüv noqtalarından keçerek gastroller ile kelip, Ukraina qanunlarını bozalar. İlhaq etilgen territoriyada sanağa çıqqan ya da Qırımnıñ Rusiye tarafından ilhaqına qol tutqanını bildirgen artistlerniñ bazıları Ukrainanıñ qıtadaki qısmında sanağa çıqmaq imkânından marum etildiler.
