Aqmescitteki Trenöv şeer bağçasında musulmanlarnıñ Qurban Bayramı keçirildi. Qırım.Aqiqat muhbiriniñ bildirgenine köre, tedbirlerni yarımadada Rusiyege tabi Devlet milletler komitetiniñ kontroli altında olğan «Halqlar dostluğı evi» teşkil etti.
Sanağa «Haytarma» qırımtatar yır ve oyun ansambli, «Qırım» folklor ansambli, Qırım artistleri Alim Aliyev ve Zera Kenjikayeva çıqtılar.
Ondan ğayrı bayramda küreş boyunca yarışma, balalar içün animatsion meydançıqları, suvenirler ve qırımtatar simvolikası ile ticaret yerleri teşkil etildi.
Qırım.Aqiqat muhbiriniñ bildirgenine köre, bayram şenliklerine 400-ge yaqın insan qatıldı.
Ağustos 21 salı künü bütün dünya musulmanları eñ büyük bayramlarından biri olğan Qurban Bayramını keçirip başladılar.
Qırımtatarlar onı Qırımda ve Ukrainanıñ qıtadaki qısmında keçireler. İlhaq etilgen yarımadada qoşumça raatlıq künü ilân etildi.
