Rusiye işğal etken Qırım ve Aqyarda avgustnıñ 10-na keçer gecesi patlavlar oldı, Rusiye ava mudafaa quvetleri ve mobil ateş gruppaları çalıştı, dep haber ete Qırım.Aqiqat, yerli Telegram kanalları ve Moskva kontrolindeki region akimiyeti.
"Krımskiy veter" Telegram kanalınıñ abunecileri bildirgenine köre, avgustnıñ 9-nda aqşam Balıqlavada eki küçlü patlav oldı, Rusiye ava mudafaası yerleşken Qaya Başta tuman köterildi. Yerli menbalarnıñ malümatına köre, Aqyarda ava telükesi ilân etildi, Balıqlava rayonında "mobil ateş gruppaları" çalıştı, ava telükesi bitken soñ ise Balıqlava TES civarında atış eşitildi.
Gece ücümleri ve ava mudafaasınıñ işi Qırım yarımadasınıñ diger rayonlarında da qayd etildi. Dronlar Aqmescit civarında Priyatnoye Svidaniye köyünde qayd etildi. Or Qapıda bir saat içinde 7 patlav oldı. "Krımskiy veter" monitoring gruppasınıñ malümatına ve uydu resimlerine köre, demiryol vokzalı artında Cenübiy sanayı alanında yanğın çıqtı, Rusiye arbiyleri anda tehnikanı saqlay ve tamir ete.
Qırım.Aqiqat menbalarınıñ malümatına köre, atış ve patlavlar "Belbek" uçaq alanında, Aqyarnıñ Gagarin rayonında, Balıqlava TES, Saq ve Saq rayonında oldı. Aqmescitte patlavdan soñ şeerniñ bir qısmı ışıqsız qaldı.
Aqyarnıñ Rusiye yolbaşçısı Mihail Razvojayev bildirgenine köre, şeer Ukrayina Silâlı quvetleriniñ darbesine oğradı. Onıñ aytqanına köre, "15 uçucısız tüşürildi. Esasen deñizde ve yalıdan uzaq".
Razvojayevniñ bildirgenine köre, "ilk malümatqa köre, kimse yaralanmadı", amma tüşken parçalar sebebinden İnjir plâjı rayonında orman yandı, insanlar tahliye etildi. Qırımnıñ Rusiye yolbaşçısı ve yerli Telegram kanallarınıñ malümatına köre, Felenk şossesinde tüşken parçalar dört maşinağa zarar ketirdi.
Avgustnıñ 10-nda saba Aqyarda kene ava telükesi oldı.
Rusiye Mudafaa nazirligi avgustnıñ 10-nda saba 16 Rusiye regionı, işğal etilgen Qırımda tüşürilgen 456 dron aqqında esabat berdi. Müessise bir delil köstermedi. Qaç dron tüşürilemedi aytılmay. Rusiye Mudafaa nazirligi bir zarar ya da ğayıp aqqında aytmadı.
Ukrayina arbiyleri al-azırda bir izaat bermedi.
Qırım.Aqiqat bu malümatnı cenk vaziyetinde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.