Aqmescitte Qırım garnizon mahkemesiniñ binası ögünde davalarında şikâyet arizası baqılacaq Nariman Celâl ve ağa-qardaş Asan ve Aziz Ahtemovlarğa qoltutmağa kelgen insanlarnı Rusiye uquq qoruyıcıları tutıp başladı. Bu aqta «Qırım esnası» haber ete.
Aq qorçalayıcılarnıñ malümatına köre, saat 10:30-ğa qadar 13 insan tutuldı – 10 erkek ve üç qadın.
«Polis hadimleriniñ malümatına köre, 102 acele hızmetke cemaat nizamı bozulğanına dair haber keldi. Tutulğanlar avtobusqa mindirilip, Jeleznodorojnıy iç işler bölügine şahsiyetlerini bilmek içün alıp ketirildi. Diñleyciler, mabüslerniñ soy-soplarını bile, mahkeme binasına almaylar», – dep aytıla haberde.
İlk malümatqa köre, tutulğanlar arasında ağa-qardaş Ahtemovlarnıñ soy-sopları ve «Qırım birdemliginiñ» eki jurnalisti bar.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Rusiye qabaatlavı dava mabüsleri içün 15 yıl apis cezası berilmesini talap etken edi.
Qırım Muhtar Cumhuriyetiniñ prokuraturası Rusiye kontrolindeki Qırım Yuqarı mahkemesiniñ Nariman Celâl ve ağa-qardaş Asan ve Aziz Ahtemovlarğa çıqarğan ükmüni qanunsız dep adlandırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
