Qırımlı ukrayınlerniñ ülke şurası Ukrayına akimiyetinden qırımlı ukrayınlerniñ problemlerini baqmasını talap etip, Qırımnıñ ukrayın cemiyetiniñ aqlarını qoruv kününi tesis etmege çağırdı. Bu aqta teşkilâtnıñ haberinde aytıla.
«Qırımlı ukrayınler cemiyetiniñ faalleri Ukrayına akimiyet organlarından cemiyetleriniñ aq ve menfaatlarını qoruv devlet siyasetiniñ yerine ketirilüvini talap ete, hususan bu vazifeniñ Qırım Muhtar Cumhuriyeti ve Aqyar şeeriniñ işğalden azat etüv ve reintegratsiya strategiyasına kirsetüv ve «Qırım platforması» tedbirlerinde qırımlı ukrayınlerniñ problemlerini muzakere etüv aqqında aytıla», – dep aytıla haberde.
«Mustaqillikniñ 31-inci yılında Qırımda qanuniy menfaat ve aqlarını qoruğan ukrayın cemiyeti bar, dep qayd emtege mecburmız. Ukrayınanıñ mustaqilliginden berli o, onıñ tasdıqlanmasına faal qoşuldı», – dep bildire teşkilât «Krımska svitlıtsâ» gazetasınıñ baş muarriri Andriy Şçekunnıñ aytqanlarını.
Qırımlı ukrayınlerniñ ülke şurasınıñ vekili, tarihiy ilimler namzeti Andriy İvanets qayd etkenine köre, qırımlı ukrayınlerniñ esas problemlerinden biri «bir taraftan işğalci devletniñ büyük ayırım-assimilâtsiya basqısı altında bulunğanı, diger taraftan Ukrayına devlet akimiyet organları diqqat etmegen kör, «boz» bir alanda qalğanları» ola.
«Qırım platforması» – Ukrayınanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayınağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
