Aqmescit «Hizb ut-Tahrir davası»nıñ iştirakçileri Üzeir ve Teymur Abdullayevler, Ayder Saledinov, Rustem İsmailov ve Emil Cemadenovnı yaqın vaqıtta rusiyedeki Rostov-na-Donu şeeriniñ SİZOsına avuştıracaqlar. Bunıñ aqqında avgustnıñ 27 advokat Emil Kurbedinov “Qırım birdemligi” cemiyet birleşmesiniñ toplaşuvında aytıp berdi dep haber ete Qırım.Aqiqatnıñ mühbiri.
Kurbedinovnıñ sözlerine köre, qabaatlanğanlar ve olarnıñ advokatları cinayet davasınıñ malümatınen tamamınen tanıştı. Yaqın vaqıtta o Şimaliy Kavkaz okrugınıñ arbiy mahkemesiniñ baqılmasına yollanılacaq.
“Aqmescit yigitleri Rostovğa etapqa azırlana, olarnıñ davaları boyunca esnas anda başlacaq. Dava malümatınen tanışuv endi bitti. Qabaatlav tarafınıñ areket tarzı deñişmey: aynı şu ekspertler, gizli video çeküvler ve gizlengen şaatlar”, - dedi Kurtbedinov.
“Qırım birdemligi” cemiyet birleşmesiniñ er aylıq toplaşuvı avgustnıñ 27 Aqmescitniñ yanındaki bir köyde keçirile. Qırım.Aqiqat mühbiriniñ haber etkenine köre, toplaşuvğa Qırımnıñ çeşit köşelerinden 50 qadar adam keldi. Olarnıñ arasında - siyasiy mabüslerniñ soyları, advokatlar, qırımtatar ve ukrain faalcileri.
Keçken ay, eki yıl devamında birinci sefer toplaşuv ötkerilmedi, çünki faalciler toplaşuv keçirmek içün bina tapıp olamadı.
Avgustnıñ 10 Kreml nezareti altındaki Qırım Yuqarı mahkemesi Aqmescit «Hizb ut-Tahrir davası»nıñ iştirakçileri Teymur Abdullayev, Emil Cemadenov, Rustem İsmailov, Üzeir Abdullayevniñ apis müddetini eki ayğa uzattı. Bir kün evel Qırım mahkemesi bu “dava”nıñ daa bir iştirakçisini - Ayder Saledinovnı tevfiqte qaldırdı.
2016 senesi oktâbrniñ 12-sinde Qırımda beş musulman qorantasınıñ evleri tintildi. Tintüvler neticesinde Rusiyede yasaq etilgen «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokatlar qayd etkenine köre, Rusiye küç organları tarafından bu dava boyunca taqip etilgenler – ekseriyeti islâm dinini kütken qırımtatarlar, bundan ğayrı - ukrain, rus, tacik, azeri ve diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
