Rusiyeniñ Qırımnı zapt etmesi qanunsız ola ve anayasağa zıt kele, dep bildirdi Türkiye prezidenti Recep Tayyip Erdoğan bu yıl Rusiyeniñ Ukrayınağa qarşı cenki sebebinden online keçirilgen «Qırım platformasınıñ» ekinci sammitinde çıqışta bulunıp ayttı.
«Qırım platformasınıñ bütün seviyelerde quvetleşmesine yardım etmege devam etecekmiz. Qırımnıñ zapt etilüvini qanunsız ve anayasağa zıt olğanını tanıymız. Em uquqiy, em ahlâqiy ceetten fikrimiz bu. Halqara uquq Qırım Ukrayınağa qaytarılsın dep talap ete. Bu bütün region ve dünya telükesizlik sisteması içün pek müim», – dedi Erdoğan.
Onıñ qayd etkenine köre, Türkiye ileride de qırımtatarlarnıñ Qırımda barışıq içinde yaşamaq ıntıluvlarına qoltutacaq.
«Qırımtatarlar – Ukrayına vatandaşları, Qırımnı inkişaf ettirmek olarnıñ menfaatlarıdır. Tarih devamında büyük zorluq çekken qırımtatarlar vatanında barışıq içinde yaşamaq içün küreşe», – dep qayd etti Erdoğan.
«Qırım platformasınıñ» birinci tesis sammiti bıltır avgustnıñ 23-nde oldı. 47 çetel devlet ve halqara teşkilât iştirak etti.
«Qırım platforması» – Ukrayınanıñ teşebbüsinen qurulğan halqara mesleat-koordinatsion formattır. Onıñ maqsadı Qırım işğaline qarşı halqara cevap semereligini arttırmaq, telükesizlik havflarınıñ artmasına cevap bermek, Rusiye Federatsiyasına qarşı halqara basqını quvetleştirmek, insan aqlarınıñ bozuluvına yol bermemek ve Rusiye rejiminiñ qurbanlarını qorumaq, em de esas maqsadı Qırımnı işğalden azat etip, Ukrayınağa keri almaqtır.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
