Aqmescitte avgustnıñ 19-nda küçlü yağmurlar sebebinden soqaqlarnı suv bastı ve bir qaç terek yıqıldı. Bu aqta Rusiye ve Qırım kütleviy haber vastaları videolarnı paylaşıp bildire.
Aqmescitniñ Rusiye akimiyeti vaziyetni resmiy şekilde izaatlamay.
Daa evel berilgen malümatqa köre, küçlü yağmurlar sebebinden avgustnıñ 18-nde Yaltanı suv bastı.
Qırımdaki Rusiye Fevqulâde vaziyetler nazirligi Qırımda avgustnıñ 18-nden küçlü yağmurlar ve saniyede 20 metr süratınen yel sebebinden furtuna havfı ilân etildi, dep bildirdi.
Hatırlatamız, iyun ayında Aqmescit ve Qarasuvbazar rayonlarında ve Aqmescitte küçlü yağanaqlar sebebinden evlerni suv bastı. İyünniñ 27-nde Rusiye kontrolindeki Qırım yolbaşçısı Sergey Aksenov fevqulâde vaziyet rejimini kirsetti.
İyunniñ 28-nde Geoinformatika ve turğun inkişaf malümatı dünya merkeziniñ GİS-mütehassısı Sergey Gapon Qırım.Aqiqatqa bildirgenine köre, Aqmescit ve Qarasuvbazar rayonlarında 2022 senesi yazda suv basuvları tekrarlana bile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
