Aqyarnıñ rusiyeli akimiyeti, aprelniñ 6-sında şeerde yañı koronavirus hastaları qayd etilmegenini bildire. Amma nezaret altından 1800-den ziyade adam buluna.
Aqyarnıñ rusiyeli ükümetiniñ matbuat hızmeti bildirgeni kibi, infektsiya hastahanesinde 22 adam yata.
"Yılnıñ başından berli 4946 adam nezaret altında edi, karantin müddeti bitkeninden soñ, 3165 adamnıñ tibbiy nezareti toqtatıldı", - denile beyanatta.
Aprelniñ 5-inde infektsiya hastahanesinde 23 adam edi, evlerinde nezaret etilgen - 1831 adam.
Daa evel berilgen malümatqa köre, Qırımda koronavirusnen hastalanğan ve özüni tecrit etüv rejimini bozğan yerli sakinge qarşı ilk cinaiy dava açıldı. Qırımlınıñ advokatı qabaatını inkâr ete ve mahkemege muracaat etmege niyetlene.
Aprelniñ 5-nde saba işğal edilgen Qırımda 2974 insan tibbiy közetüv altında, 2886-sı dinamik közetüvde qala. 66 insan hastahanede, 22 insan observatorda buluna. Qırımda 20 koronavirus yuqunçı hastası qayd etildi, 6 tüzelgen hasta hastahaneden çıkarıldı. Aqyarda 5 kişi koronavirusqa oğradı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
