Rusiyeniñ Vlasiha şeerindeki Arbiy istinaf mahkemesi "Qırım musulmanları davası"nıñ mabüsi iman Raif Fevziyevniñ tevqif müddetiniñ uzattırılmasına qarşı berilgen şikâyetni red etti. Bunı "Qırım birdemligi" cemaat birleşmesi advokat Edem Semedlâyevge atfı etip bildire.
"Bu daima olğanı kibi evelden azırlanğa cevaptır", - dedi Semedlâyev.
Qabaatlav tarafı apis müddetiniñ uzatılmasınıñ tarafdarı olaraq, cinayet davasında gizli şaatlarnıñ olmasına atfı etip, prokurornıñ sözlerine köre, sıñırlama tedbiri ev apsine deñiştirilse Raif Fevziyev olarğa tesir kotere bilecegini bildirdi. Aynı zamanda mudafaa tarafınıñ bildirgenine köre, bu şaatlarnıñ kim olğanı belli degil. Bundan ğayrı, olarnıñ sorğuğa çekilmesi vaqtında şaatlarnıñ qabaatlanğan kişini ömürde körmegenleri belli edi.
Evrl Rusiyeniñ Rostov-na-Donu şeeriniñ Cenübiy bölgesiniñ arbiy mahkemesi "Qırım musulmanları davası"nıñ mabüsi imam Raif Fevziyevniñ tevqifini 2023 senesi yanvarniñ 23-ne qadar uzattırdı.
Fevralniñ 8-nde Aqmescitteki SİZO-1-de Rusiyeniñ Rostov-na-Donu Cenübiy okrugınıñ arbiy mahkemesi ile video bağı vastasınen «qırımlı musulmanlar davası» boyunca imam Raif Fevziyevge qarşı ilk oturışuv ötkerilgen edi. Advokat Emil Kurbedinovnıñ bildirgenine köre, Fevziyevniñ apiste qaluv müddeti yarım yılğa uzatıldı.
Berilgen malümatqa köre, Rusiye FSBsi 2021 senesi avgust ayında tutulğan aralarında Raif Fevziyev de olğan beş qırımtatarı ve musulmanğa qarşı «akimiyetni zorbalıqnen zapt etüv» cinaiy davasını açtı.
2021 senesi avgust ayında Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
Raif Fevziyev ve Cebbar Bekirov Rusiye Ceza kodeksiniñ 205.5 maddesiniñ 1-inci qısmına istinaden (Terror teşkilâtınıñ faaliyetini teşkil etüv), qalğanları ise Rusiye Ceza kodeksiniñ 205.5 maddesiniñ 2-nci qısmına istinaden (Terror teşkilâtınıñ faaliyetinde iştirak etüv) şübheli ola. Avgustnıñ 17-nde ve 18-nde Rusiye qadıları tutulğanlarnı nezaret altına aldı. Tutulğanlar ya da advokatları yañı qabaatlavlarnı tefsir etmey.
Qırım Muhtar Cumhuriyeti ve Aqyar prokuraturası qırımtatarlarnıñ evlerinde keçirilgen yañı tintüvler ve tutuvlarnen bağlı cinaiy tahqiqat açılğanını bildirgen edi.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
