Qırım sakinleri Natalya Kuşnarenko ve Mihail Berejnoyğa rus çetellik pasportı esasında Finlândiya turistik vizaları berilgeni ve ülkege yiberilgeni – tesadüfiy hata. Bunıñ aqqında ukrain diplomatı, Finlândiyada Ukrainanıñ fevqulâde ve salâhiyetli elçisi Andrey Olefirov, hucur vaqianı tefsir eterek, Qırım.Aqiqat Radiosı efirinde haber etti.
“Men bellesem, bu adamlarnı turistik vizasınen Finlândiyağa yañlışıp kirsettiler: er yıl Sankt-Peterburg konsullıqlarında millionğa qadar şengen vizası berile. Böyle vizalarnı yasaqlağan qanun, elbette ki, yoq, bu – Ukrainanıñ ricasına AB memleketleriniñ cevabı”, - dep qayd etti elçi.
Olefirov qoştı ki, böyle meselelerde mesüliyet taşığan soñki basamaq – ülke içinde kelgenlerniñ vesiqalarını teşkergen köç (migratsion) memurları, vekillik degil.
“Finlândiya köç memurları bu insanlar qaydan kelgenini ve vesiqaları bütünley Qırımda berilgenini añlağan soñ, Tış İşler Nazirligimizniñ tevsiyelerine uydılar. Bütün qırımlılar, vatandaşlığında vazgeçmegence, Ukraina vatandaşları sayıla”, - dedi diplomat.
RBK (РБК) Rusiye haber agentligi, apay-aqay Natalya Kuşnarenko ve Mihail Berejnoy rus pasportlarını Qırımda alğanları içün, Finlândiyadan Ukrainağa sürgün etile bilgenlerini, iyülniñ 27-sinde haber etti.
“RİA Novosti” bildirgenine köre, qoranta Finlândiyanıñ Sankt-Peterburgdaki Baş konsullığında alınğan vesiqalarınen, 2017 senesi sentâbr ayında Finlândiyağa keldi. Kelgeninen olar öz şirketini qayd etti ve ikâmet ruhsetnamesine vesiqa tapşırdı. Neticede, Finlândiya Qırımda berilgen pasportlarnı qabul etmegeni aqqında memurlardan vesiqa aldılar.
Rusiye elçiliginiñ matbuat attaşesi Natalya Vejlivtseva, RBK-ğa bildirgeni kibi, , Rusiye “vaziyetni diqqatnen közete". Sürgünlik meselesi çezilmegence Vejlivtseva Qırım.Aqıqat muhbirlerine tefsir bermekni red etti.
