Keriçniñ Rusiye memuriyeti «VKontakte» içtimaiy ağındaki saifesinde Rusiye Z-arbiyiniñ resminen «añlaşmalı 6 aylıq arbiy hızmet» reklamasını derc etti.
Keriç akimiyetiniñ haberinde Aqmescitteki saylav noqtasına (Kiyevskaya soq., 152) muracaat etmege çağıralar.
«Mahsus arbiy operatsiyanıñ» iştirakçilerine (Rusiye Federatsiyası Ukrayınağa qarşı cenkni böyle adlandıra – QA) «qoşma içtimaiy kefaletler» vade etile. Tam olaraq bildirilmey.
Qırım.Aqiqat mühbiri bildirgenine köre, Qırımda Aqyarda yerleşken Rusiye Qara deñiz flotu deñiz piyadesiniñ 810-uncı brigadasına «göñülli» qıdıralar. Ukrayına Silâlı quvetleri Baş ştabınıñ malümatına köre, deñiz piyade askerleriniñ 810-uncı brigadası askerleriniñ 85%-ını coydı.
Rusiye kontrolindeki Qırım yolbaşçısı Sergey Aksenov esas Ukrayınağa 1200 «göñüllini» yolladı ve daa eki batalyon azırlay, dep bildirdi. Qırımdaki Rusiye kütleviy haber vastaları «añlaşmalı arbiy hızmetniñ» reklamasını yapa.
Qırım ve Aqyarnıñ Rusiye akimiyeti işğal etilgen yarımadadan elâk olğan ve yaralanğan rusiye arbiyleriniñ tam sayısını aydınlatmay. Rusiye Federatsiyasınıñ Mudafaa nazirligi Ukrayınada körgen zararları aqqında iç malümat bermey.
Qırımnıñ Rusiye yolbaşçısı Sergey Aksenov qırımlı Rusiye arbiyleriniñ elâk olğanını tanıdı, amma tam sayısını aytmadı. Qırım.Aqiqat bildirgenine köre, Rusiye arbiyleriniñ cenazeleri Aluşta, Sudaq, Saq, Keriç ve Yaltada oldı.
Aqyarnıñ Rusiye akimiyeti resmiy şekilde esas Ukrayınada Aqyarda yaşağan eñ az 40 Rusiye arbiyi elâk oldı, dep bildirdi.
Ukrayına prokuraturasınıñ malümatına köre, 2015 senesinden başlap Rusiye Qırımda Rusiye Federatsiyasınıñ silâlı quvetlerine askerlikke aluv qanunsız kampaniyasını 15 kere keçirdi. Aq qorçalayıcılar Qırım ve Aqyar sakinleriniñ Rusiye ordusına aluvını halqara uquq bozuluvı dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
