Herson vilâyetiniñ Rusiye qurğan Geniçesk rayon mahkemesi 33 yaşında erkekni “Noman Çelebicihan qırımtatar göñülli batalyonında” iştirak etkeninde ğıyabiy şekilde qabaatlap, doquz yıl koloniyada qalmasına üküm etti. Bu aqta Rusiye kütleviy haber vastaları Qırım ve Aqyardaki Rusiye FSB idaresiniñ malümatına esaslanıp bildire.
Berilgen malümatqa köre, erkek 2015 senesi dekabr ayında göñülli olaraq batalyonğa qoşuldı.
“O, qaravul edi, Ukrayina ve Rusiye Federatsiyasınıñ devlet sıñırında naqliyat vastalarını teşkergen, Herson vilâyeti Geniçesk rayonındaki Çonğar mesken yeri yaqınlarında birleşmeniñ qanunsız inşaatlarını qaravullağan edi”, – dep bildire Rusiye FSBsiniñ malümatını “RİA Novosti Krım”.
Erkekniñ adı ve soyadı aytılmay, onıñ izaatları da yoq. Rusiye uquq qoruyıcıları onı halqara qıdıruvğa ilân etti.
Rusiye FSBsi “Noman Çelebicihan qırımtatar göñülli batalyonını” 2022 senesi “terror teşkilâtları” cedveline kirsetti.
2014 senesinden başlap Qırımtatar resurs merkezi “Noman Çelebicihan batalyonında” iştirak etüvde qabaatlanğan 66 kişiniñ tutulğanını qayd etti: 2022 senesi fevralniñ 24-nden soñ 19 – işğal etilgen Qırımda ve 47 – işğal etilgen Herson vilâyetinde.
Noman Çelebicihan qırımtatar batalyonı
Noman Çelebicihan qırımtatar batalyonı – 2016 senesiniñ başında esas Ukrayınanıñ işğal etilgen Qırımnen memuriy sıñırında qurulğan göñülli qırımtatar birleşmesidir. Batalyonğa qırımtatar siyasetçi ve cemaat erbabı, Qırım Halq Cumhuriyeti ükümetiniñ birinci Reisi, Qırımnıñ I Qurultay teşkilâtçısı, Litvaniya, Poloniya, Beyazrusiye müftisi Noman Çelebicihannıñ adı berildi.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete. Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi. «Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
İyünniñ 1-nde Rusiye Yuqarı mahkemesi «Noman Çelebicihan qırımtatar göñülli batalyonını» Rusiyede yasaqlap, «terror» teşkilâtı dep tanıdı.