Qırımtatar faali ve vatandaş jurnalisti Seyran Saliyev eki aydan berli Rusiyeniñ Tula vilâyetindeki №4 ceza koloniyası (İK) ceza izolâtorında (ŞİZO) tutula. Bu aqta ömür arqadaşı Mümine Saliyeva Facebook saifesinde bildirdi.
«Men koloniya memuriyetine bir qaç kere mektüp yolladım. Yanvarniñ 10-nda 2024 senesi iyül ayında aqayımnı SUONğa (cezanı çeküvniñ sert şaraitleri) çıqarğanı aqqında cevap keldi – bu menim içün endi belli bir şey edi: «Sizge şunı haber etemiz ki, mahküm etilgen Saliyev Seyran Alimoviç, 1985 senesi doğğan, 01.09.2022 senesinden başlap Rusiyeniñ Tula vilâyetinde FKU İK-4 UFSİNinde cezasını çeke. 21.06.2024-te ceza müessisesiniñ komissiya qararı ile Saliyev S.A. cezanı çeküvniñ belgilengen tertibini yaramay niyetnen bozğan olaraq tanıldı ve Rusiye Federatsiyası Ceza İcra Kodeksiniñ 122-nci maddesiniñ 3-nci qısmına istinaden sert şaraitlerge avuştırıldı». Böylece aqayımnı ceza izolâtorına yollağanlarını köstermediler», – dep yazdı Saliyeva.
Mümine Saliyeva yazğanına köre, onıñ daa bir muracaatına cevap olaraq oña Seyrannı ceza kamerasına yerleştirgenleri aqqında haber berildi.
«2025 senesi yanvarniñ 8-nde mabüs yanvar 9-da cezasını çeküvniñ belgilengen tertibini bozdı, 2025 senesi yanvarniñ 9-nda komissiya qararınen tüzetüv müessisesiniñ komissiya qararınen ceza izolâtorına alındı». Amma mabüs Saliyevniñ 2024 senesi noyabrniñ 20-nden başlap ceza kamerasında tutulğanı cevap mektüplerinde bir yerde aytılmay», – dep bildirdi Saliyevniñ cevabını FSİN.
Saliyeva advokatlarnen beraber «uquqiy alanda imaye mehanizmlerini işlep çıqacaq», dep qoştı.
«Men jurnalist arqadaşlarımdan malümat yardımını rica etem. İnsanlar, siyasiy ve cemaat erbaplarından – cemaat reaktsiyası ve muzakereler – cemaat fikri bir çoq ceryanlarğa tesir ete bile», – dep qoştı Saliyeva.
Saliyev Rusiye quvetçileri tarafından 2017 senesi oktâbr ayında tutuldı. Onı Rusiyede yasaq etilgen «Hizb ut-Tahrir» teşkilâtınıñ faaliyetinde qabaatladılar. 2020 senesi Rusiye mahkemesi Saliyevni 16 yılğa üküm etti.
Saliyev apiske alınmazdan evel ekskursovod olıp çalıştı. Tasili türk ve qırımtatar tilleriniñ filologıdır. Saliyev «Qırım birdemliginiñ» vatandaş jurnalisti olıp, Rusiye akimiyeti tarafından qırımtatarlarğa qarşı yapılğan taqiplerni aydınlata edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
