Mayıs 25-inde Rostov-na-Donudaki Cenübiy bölge arbiy mahkemesinde Qurman "Hizb ut-Tahrir davası" boyunca oturışta, Arsen Abhairov tutulğanda şaat olğanlarnısorğuğa çektiler. Advokat Lilâ Gececi aytqanına köre, şaatlarnıñ üçü - Aqmescit politehnika kolleciniñ talebeleridir.
Bunı o Qırım.Aqiqat mühbirine aytıp berdi.
"Tintüvden olğan üç şaattan sadece ekisi protokolğa azırldı. Soñra bilingeni kibi, olarnıñ episi bir köllecde oquy ve köllec reberliginden tintüvde iştirak etmek teklifini aldı. Ameliyatnıñ oquv yurtunıñ reberliginiñ razılığı ile qaçırğanlarını bildik. Yani, sen tintüvge barsañ, oquv yurtunıñ müdiriyeti seni bunıñ içün maqtay. İmaye tarafı, küç organları bu şahıslarnı qullandı, dep saya", - dedi advokat.
Mayısnıñ 25-inde Rostov-na-Donudaki Cenübiy bölge arbiy mahkemesi Qurman "Hizb ut-Tahrir davası" boyunca mahkemeni iyün 10-una avuştırdı.
Rostov-na-Donu Cenübiy okrugınıñ arbiy mahkemesi (Rusiye) yanvarniñ 29-nda Qurmandaki «Hizb ut-Tahrir davasınıñ» mabüsleri Rustem Emirüseinov, Arsen Abhairov ve Eskender Abdulganiyevniñ davası temelden baqılıp başlandı.
2019 senesi dekabr ayında Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davası» mabüslerini 2020 senesi iyünniñ 13-ne qadar apiste qaldırdı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinovalındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
