Sentâbr 19-ında 4-ünci Kyiv prokuraturası prokurorınıñ muracaatı ile paytahtnıñ Dnepr rayon mahkemesi, sabıq siyasiy mabüs, qırımlı Volodımır Baluhnıñ ağır yaralandırmasında şübelengen adam eki ayğa apis etildi. Bunü Kyiv prokuraturasınıñ matbuat kâtibi Nadiya Maksimets haber etti.
"Mahkeme apis cezası içün alternativani tayin etmedi. Şübeli 32 yaşındaki Kyiv vilâyetiniñ sakini, işsiz, qabaatını bütünley tanıy, advokattan red etti. Onıñ aytqanına köre, dava turmuş sebepten başlandı", - yazdı Maksimets Facebook saifesinde.
Ukraina Milliy politsiyası sentâbr 18-inde Baluhnı urıp yaralağanda şübelengen adamnı tuttı.
«Avropa birdemligi» firqasından halq deputatı İrına Ğeraşçenkonıñ bildirgenine köre, Volodımır Baluhnıñ alı aqqında ekimlernen qoşma mesleatlar keçirildi. Oña ameliyat yapıldı ve reanimatsiyağa alğanlar. Daa soñra Baluh aqcigerlerni suniy avalandıruv cihazına bağlandı. Onıñ ağır qafa-miy yarası bar.
Baluh köteklengenini Oleg Sentsov haber etti. Onıñ malümatına köre, faal sentâbrniñ 7-nden 8-ne keçer gecesi köteklendi. Ağır alda hastahanege alındı – qolu ve köpürçik kemigi sındırıldı.
Kiyv politsiyasınıñ malümatına köre, qırımlı 10-15 kişinen «Gidroparktaki» qavelerden birinde raatlanğan edi. Soñki sefer onı yarı gecede körgenler. Uquq qoruyıcılar Ukraina Ceza kodeksiniñ 187-inci maddesiniñ 4-ünci qısmına istinaden (aydutlıq) cinaiy tahqiqat başlattı.
Ukraina prezidentiniñ ofisi qırımlığa yapılğan ücüm sebebinden qasevetlengenini bildirdi.
