Rusiye tarafdarları olğan "Qırım" cemiyet areketiniñ azaları, Qırım Muendislik ve Pedagogika Universitetine onıñ birinci rektorı ve prezidenti, Ukraina Qaramanı olğan Fevzi Yakubovnıñ adını bermege teklif etti.
"O, Qırım Muendislik ve Pedagogika Universiteti qurulmasınıñ başında turdı, anda faydalı bilgilernen paylaşa edi. "Qırım" qırımtatar cemiyet areketiniñ prezidiumı, Qırım Muendislik ve Pedagogika Universitetine Fevzi Yakubovnıñ adını bermek teşebbüsini müim ve kerekli saya", - denile teşkilâtnıñ Facebook saifesinde.
Avgust 23-ünde 82 yaşındaki Fevzi Yakubov devamlı hastalıqtan soñ keçindi.
Fevzi Yakubov – tehnika ilimleri doktorı, professor, Özbekistanda nam qazanğan ilim erbabı, Ukrainada nam qazanğan tasil hadimi, Qırımnıñ şerefli sakini, Ukraina qaramanı.
Qırım ilhaqından soñ Yakubov, Rusiye prezidenti Vladimir Putinniñ işançlı şahsı oldı.
