Canköyde noyabrniñ 17-ne keçer gecesi küçlü patlavlar eşitildi, yerli Telegram kanalları ava mudafaa sistemasınıñ işi aqqında bildire.
«Ava mudafaa sisteması çalıştı, telâşlanmañız», – dep haber etti «Tipiçnıy Canköy» Telegram kanalı.
«Krımskiy veter» telegram kanalı öz menbalarına esaslanıp, Canköyde Rusiye arbiy uçaq alanına darbe endirildi, dep haber ete. Şeerde gece patlavlarından soñ ışıq problemleri oldı, dep haber ete «Krımskiy veter» abunecileri.
Qırımnıñ Rusiye akimiyeti ve Rusiye Mudafaa nazirligi resmiy malümat daa bermedi. Ukrayına arbiyleri ve resmiy şahısları da şimdilik bir izaat bermedi.
Yerli sakinler Canköyde oktâbrniñ 17-nde olğan patlavlar aqqında bildirgen edi. Canköy saifeleri bu yıl avgust ayında olğan patlavlardan soñ snarâdlarnı mayınsızlaştıruv işleri aqqında bildirgen edi.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayına uçucısızlarına» atış ve «ava mudafaa sistemalarınıñ işi» aqqında ayta.
Avgustnıñ 16-nda Canköy rayonındaki silâ anbarlarında patlavlar oldı. Rusiye Mudafaa nazirligi buña «diversiya» dep ayttı.
Sentâbrniñ 7-nde Ukrayına Silâlı quvetleriniñ baş komandanı Valeriy Zalujnıy 2022 senesi avgust ayında Qırımdaki Rusiye arbiy obyektlerine qarşı Ukrayına arbiyleriniñ raketa darbelerini tanıdı. Ukrayına mudafaa nazirligi qırımlılarnı Qırımdaki Rusiye ordularınıñ yerlerini «eVoroğ» çat-botuna bildirmege çağırdı.
The New York Times neşiri Ukrayına memurınıñ malümatına esaslanıp, Qırımdaki patlavlar «elit Ukrayına arbiy bölügi» yardımınen kerçekleştirildi, dep bildirdi. Memur gizli qalmaq şartınen laf etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
