Rusiye kontrolindeki Qırım mahkemeleri yarım yıl içinde Rusiye silâlı quvetlerini itibardan tüşürüv 109 davasını baqtı. Bu aqta «KrımSOS» aq qorçalayıcı teşkilâtınıñ talilcisi Yevğen Yaroşenko bildirdi.
«Aman-aman yarım yıl içinde «Qırım mahkemeleri» 105 insanğa qarşı Rusiye silâlı quvetlerini itibardan tüşürüvnen bağlı 109 idariy dava açtı. Tek eki davada şahıslar qabaatsız tanıldı», – dep qayd etti Yaroşenko.
«KrımSOS» malümatına köre, 96 davada insanlar ortalama 30 biñ ruble para cezasını aldı. Sekiz dava diger mahkemelerge berildi ya da qararları daa çıqarılmadı. 11 davada vesiqalarda hata tapıldı ve davalar memuriy tahqiqat talap etken organlarğa qaytarıldı.
«Cenk olmasın», «Ukrayına yaşasın» şiarları, Ukrayına timsalleriniñ numayış etilüvi – Rusiye silâlı quvetlerini itibardan tüşürüv sebebinden mesüliyetke çekmek içün sebep ola», – dep ayttı Yaroşenko.
Rusiye ordusını «itibardan tüşürüv» memuriy maddesi Rusiye Ukrayınağa ücüm etken soñ peyda oldı. Rusiye mahkemeleri Moskva «mahsus operatsiya» dep adlandırğan Ukrayınağa qarşı cenk aqqında haber berüvni «itibardan tüşürüv» dep saya.
«OVD-İnfo» aq qorçalayıcı leyhasınıñ malümatına köre, bu maddege istinaden 3800-den çoq dava açıldı. Rusiye Silâlı quvetlerini tekrar «itibardan tüşürüv» üç yılğa qadar azatlıqtan marum etüvni belgilemekte.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
