Aqmescit (Simferopol) rayonında, orman yanğını neticesinde ilan etilgen fevqulâde vaziyet rejimi lâğu etildi.
Bunı Rusiye nezaretindeki Qırım akimiyetiniñ FVN-niñ matbuat hızmeti haber ete.
"Tünevin, noyabr 17-sinde, Aqmescit rayonınıñ fevqulâde vaziyetleri boyunca komissiyanıñ oturışı edi. Anda, "fevqulâde vaziyet"niñ lâgu etilmesi aqqında qarar alındı", - dedi müessise başı Sergey Şahov.
Yanğın noyabrniñ 14-nde çıqtı. Ertesi künü Aqmescit rayonında fevqulâde vaziyet rejimi ilân etildi. Yanğınnı söndürmek içün qurtarıcılar aviatsiyanı celp etti.
Yüksek yanğın telükesi sebebinden yarımadada furtuna havfı ihtarını noyabrniñ 18-ne qadar uzattılar.
Noyabr 16-sında qurtarıcılar, Aqmescit rayonınıñ Kürlük-Baş ayırığında 52 gektarlıq alannı qavrap alğan orman yanğını söndürildi, dep bildirdi. Elâk olğan ve yaralanğanlar yoq, dep bildirdi Qırımdaki Rusiye Fevqulâde vaziyetler nazirliginiñ idaresi.
