BMT insan aqları Şurasınıñ 46-ncı sessiyasında çeh delegatsiyası Rusiyede ve işğal etilgen Qırımda tutulğan ukrain siyasiy mabüslerini azat etmege çağırdı. Bundan ğayrı daa yaqında yarımadada tevqif etilgen Azatlıq Radiosınıñ şttan tış hadimi Vladislav Yesipenko aqqında da hatırlattı.
«Esassız teqifler, qaçırmalar, iskenceler aqqında bütün kerçek bildirmelerni mustaqi şekilde tahqiq etmege çağıramız. Rusiyeni bütün ukrain siyasiy mabslerini azat etmege çağırımız», – dep yazıla bildirmede.
Ayrıca beyanatta apis etilgen üç aq-uquq qoruyıcınıñ adı añıla: Emir-Üsein Kuku, Server Mustafayev ve Seyran Saliyev.
«Bundan ğayrı yaqında jurnalist Vladislav Yesipenkonıñ tevqif etilmesinden raatsız olğanımıznı bilidirmege isteymiz», – dep qayd etile.
Çeh delegatsiyası Rusiye akimiyetini Qırımda pandemiyağa qarşı kerekli çareler körmesine ve memuriy sıñırdan keçme sıñırlavlarını lâğu etmesine çağırdı.
Martnıñ 23-nde işğal etilgen Qırımda tevqif etilgen Vladislav Yesipenkonı ükmüne qarşı mustaqil imayecilerniñ şikâyeti baqılğan mahkeme oturışına ketirmediler.
Emir-Usein Kuku – qırımtatar aq qorçalayıcısı ve faali. 2019 senesi noyabrniñ 12-nde Rusiyeniñ Cenübiy okrugınıñ arbiy mahkemesi onı «terror teşkilâtınıñ faaliyetini teşkil etkeninde» qabaatlap, 12 yılğa üküm etti. Amnesty International Kukunı vicdan mabüsi dep saya.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
