Rusiye nezaretindeki Qırım başı Sergey Aksönov, iyül 27-sinde Moskova şeer duması saylavlarınen bağlı Moskova aktsiyalarını ve faallerniñ quvulmasını, 2014 yılı Kyivde olğan Avromaydan vaqialarınen qıyas etti. Amma o, rusiye quvetçilerini Moskovada faallerni quvıp-aydağanına qol tuttı ve "qanunsız narazılıq aktsiyaları"nda iştirak etmemege çağırttı.
Hususan, o, Moskova vaqialarına "maydan tehnologiyalarınıñ rusiye şaraitinde qullanmaq ıntıluvı", dep ayyttı.
"Vatandaşlarımıznı qanunsız narazılıq aktsiyalarında iştirak etmemege çağırtam. Ğarp isteklerini kütken "beşinci kolonna", adamlarımıznı maydanlarında "et" yerine qullanuvına yol bermemelimiz", - dep yazdı o Facebookta iyül 31-inde.
İyül 27-sinde Moskovada Moskova şeer duması saylavlarına mustaqil mabuslarnıñ iştirak etmek içün yiberilmesini talap etken izinsiz aktsiya keçti. Uquq qoruyıcılarğa köre, aktsiyada politsiya ve Rosgvardiya 1373 adamnıtutıp aldı, olardan 200-den ziyadesi geceni politsiya bölüklerinde keçirdi. Narazılıq iştirakçilerniñ 70-den ziyadesi yaralandı.
"OVD-İnfo" rusiye portalınıñ malümatına köre, bir yarım biñ adam tutuldı, olarnıñ arasında - onlarce mustqil namzet. Yetmişden ziyade aktsiya iştirakçileri yaralandı.
