2020 senesi aprel ayında Qırım ve Herson vilâyeti arasındaki memuriy sıñırdan 2113 adam ve 188 naqliyat keçti. Keçken ayda sıñır keçüvleri 97-den ziyade fayızğa azlaştı. Bunı Muvaqqat işğal etilgen topraqlarnıñ reintegratsiyası meseleleri boyunca nazirlik bildirdi.
"Mart ayı ile qıyaslağanda, adamlarnıñ sıñırdan keçkeni 97,49%-ğa, naqliyatnıñ ise 98,66%-ğa azlaştı", - denile beyanatta.
Qırım ve Herson vilâyeti arasındaki memuriy sıñırdaki sıñırlavlar mayıs 22-sinece sürecek. Daa evel Ukraina Nazirler Kabineti, Ukraina qıtasına ilhaq etilgen Qırımdan ve işğal etilgen Donetsk ve Luğansk vilâyetlerinden kelgen vatandaşlar mecburen observatorlarğa yollanılacağını bildirdi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
