Tünevin Qırımda altı yañı koronavirus adisesi qayd etildi, bunı Qırımnıñ rusiyeli başı Sergey Aksönov bildirdi.
Aksönov Facebookta yazğanı kibi, hastalarnıñ birisi tibbiy yardımnı sorağanda bilindi, qalğan 5 adise epidemiologiya tahqiqi neticesinde belli oldı. Bildirile ki, hastalarnıñ episi infektsiya hastahanesine qoyuldı. Altı adiseden beşi simptomsız edi.
Qırımnıñ Rusiye akimiyeti malümatına köre, bugünge qadar 346 yañı koronavirus hastası qayd etildi. 25-i çetelden keldi, 44-ü Rusiyeden keldi. 153 kişi tüzeldi, 9 koronavirus hastası vefat etti. Aqyarda 155 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
