Kreml Ukrayına prezidenti Volodımır Zelenskıynıñ yañı Minsk añlaşmaları olmaycaq degen laflarına cevap berdi.
"Zelenskıynıñ "Minsk-3" olmaycaq degen lafları Kyivniñ muzakere keçirmege istemegenini isbatlay", – dep bildirdi Rusiye prezidentiniñ vekili Dmitriy Peskov "RİA Novosti" agentligine bergen izaatında.
Noyabrniñ 15-nde Ukrayına prezidenti Volodımır Zelenskıy İndoneziyadaki sammitke toplaşqan G20 memleketleriniñ liderlerine video bağı vastasınen muracaat etip, Rusiye büyük istilâsını toqtatmalarına çağırdı. O, diger memleketlerden Kyivden "vicdan ile uzlaşmağa" talap etmemesini rica etti.
"Ukrayına vicdan, suverenitet, topraq ve bütünliginen uzlaşuv yapamaz", – dedi o.
Zelenskıy, cenk "adaletli bir şekilde ve BM ve halqara uquqnıñ nizamnamesi esasında" bitirilmeli dep, Minsk añlaşmalarına kimse qaytmaycaq, dep bildirdi.
Rusiye-Ukrayına muzakereleri mayısta toqtatıldı. Soñki körüşüv martnıñ 29-nda İstanbulda oldı.
Ukrayına Silâlı quvetleriniñ strategik ğalebeleri sayesinde soñki aftaları çeşit memleketlerniñ siyasiy erbapları muzakere ihtimali aqqında sıq-sıq aytıp başladı.
Noyabrniñ 11-nde Ukrayına prezidenti Volodımır Zelenskıy Rusiye ile muzakere qapusını qapatmadı, amma şimdiki reberlerinen muzakere keçirmek neticesiz olacaq, dep tüşüne.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
