Rusiye eyyeti ABDde Ukrayinanen olacaq körüşüvde olmaycaq, dep bildirdi Kreml spikeri Dmitriy Peskov martnıñ 20-nde.
"Yoq, bu ukrayinalılarnıñ amerikalılarnen eki taraflı bağları olacaq", – dep bildire aytqanlarını TASS Rusiye devlet agentligi.
Ukrayina prezidenti Volodımır Zelenskıy martnıñ 21-nde ABDde Ukrayina vekilleriniñ ABD vekillerinen körüşüvi olacaq, dep haber etti.
"Amerika tarafınıñ Rusiyeniñ Ukrayinağa qarşı cenkini bitirüv muzakereleriniñ olğan formatlarında işini devam ettirmege azır olğanına dair işaretleriniñ olması müim. Muzakere pauzası oldı, onı bitirmek kerek. Ve biz muzakereler mündericeli olsun dep elimizden kelgenini yapamız. Ukrayina taqımı – muzakere gruppasınıñ siyasiy qısmı – endi yolda, ve bu cumaertesi künü Amerika Birleşken Devletlerinde körüşüvler bekleymiz", – dep ayttı o.
Yanvar ve fevral ayları devamında Ukrayina, ABD ve Rusiye üç taraflı körüşüvleriniñ bir qaç raundı oldı. Bir netice olaraq aytılmadı. Amma fevralniñ 5-nde eyyetler cenk esirlerini deñişüv aqqında añlaştı – soñki aylarda ilk oldı.
Martnıñ başında Birleşken Arap Emirlikleriniñ paytahtı Abu-Dabide keçirilüvi planlaştırılğan daa bir körüşüv Yaqın Şarqtaki vaziyet kerginleşkeni içün belli olmağan bir vaqıtqa qaldırıldı.