Rusiye ordusı işğal etken Herson vilâyetiniñ qısmı kiriş ve çıqışqa qapatıldı, dep bildire Ukrayına Silâlı quvetleriniñ Baş ştabı.
Ukrayına arbiyleri areket sıñırlavınıñ sebeplerini bildirmey.
Bir qaç kün evelsi Ukrayına Silâlı quvetleriniñ Baş ştabı Zaporijjâ ve Herson vilâyetlerinde Ukrayına vatandaşlığından vazgeçken ve Rusiye pasportlarını alğan er adamlarğa işğalci akimiyet seferberlik celpnamelerini berip başladı.
Herson ve Zaporijjâ vilâyetleriniñ bir qısmı alâ daa Rusiye ordusı tarafından kontrol etile. Soñki bir qaç kün devamında işğalci küçler Ukrayına toprağında Rusiyege qoşuluv sahte referendumlarını keçire. Kyiv bu rey berüvniñ fiiliy aqibetleri olmaycaq, dep qayd ete. Ğarbiy liderler Kremlniñ referendum keçirmek niyetlerini takbih etip, neticelerini tanımaycaq, dep tenbiledi.
Sentâbrniñ 21-nde Rusiye prezidenti Vladimir Putin memlekette qısmiy seferberlik ilân etip, buyruq imzaladı. Rusiye akimiyeti 300 insannı seferber etmege niyetlene, dep bildirdi, amma kütleviy haber vastalarınıñ malümatına köre, bu raqam million insandan çoq ola bile.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
