Rusiye uçucısızlarınıñ gece Harkivge qarşı yapqan ücümi neticesinde altı insan elâk oldı, daa on insan yaralandı. Bu aqta şeer yolbaşçısı İgor Terehov bildirdi.
Terehovnıñ aytqanına köre, «Şahed» uçucısızları mesken inşaatqa ücüm etti. İlk malümatqa köre, doquz çoq qatlı ev, üç yataqhane, diger binalar, yaqıt stantsiyası ve on maşina zarar kördi.
Harkiv vilâyeti arbiy memuriyetiniñ yolbaşçısı Oleg Sinegubov yazğanına köre, «tek vatandaş obyektleri» zarar kördi. O, sekiz kişiniñ orta seviyeli yaraları bar, qalğanlarınıñ yaraları ağır degil.
Ukrayına Silâlı quvetleri bildirgenine köre, aprelniñ 6-na keçer gecesi Rusiye Ukrayınağa qarşı 32 «Şahed» darbe uçucısızını ve altı çeşit raketanı qullandı. Üç raketa ve 28 uçucısız urıp tüşürildi. Rusiye Mudafaa nazirligi Harkivge qarşı ücümni izaatlamadı.
Aprelniñ 4-nde Rusiye uçucısızlarınıñ Harkivge qarşı ücümi neticesinde dört insan elâk oldı, üçü qurtaruv hızmetiniñ hadimi edi. 10-dan çoq insan yaralandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
