Keriç şeerinde oktâbrniñ 17-sini “kütleviy öldürüv qurbanlarınıñ hatırasını añma Künü” kibi belgilemekniñ imkâniyetini muzakere eteler. Bu teşebbüs, bir kün evel Rusiye nezareti altındaki Şeer cemaat şurasınıñ oturuşında baqıldı.
Şeerniñ rusiye akimiyetiniñ matbuat hızmeti bildirgeni kibi, oturuşta Keriç başı Nikolay Gusakov iştirak etti.
“Keriçliler er yıl bu künü, bütün şeerni şaşırtqan deşetli facianıñ qabaatsız qurbanlarınıñ hatırasını añıp olur”, - denile beyanatta.
Aynı zamanda, Keriç memuriyetiniñ saytında böyle hatıra kününiñ tayinlenmesi aqqında resmiy malümat yoq.
Oktâbrniñ 17-nde, çarşenbe künü, Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
