Keriç köprüniñ yük naqliyatı qısmı açılğanından soñ, bir afta devamında 10 biñge yaqın fura keçti. Bu hususta “Qırım köprü” haber merkezi bildirmekte.
Matbuat hızmetiniñ malümatına köre, areketiniñ eñ yüksek şiddeti - 2,2 biñ maşnadan ziyade - oktâbr 1-inde qayd etildi, yani sıñırlavnıñ alıp taşlanılğanıñ birinci kününde. Eñ alçaq yol areketiniñ şiddeti ise bazar künü, oktâbr 7-sinde qayd olundı - 3,5 tonna ağırlığındaki 1 biñden az maşna. İş künleri yük naqliyatnıñ keçüvi er kün 1 300 - 1 500 maşnanı tertip ete.
Haber merkezinde, şimdilik köpürde yol areketi adiy tertipte keçe dep qoştılar.
Oktâbrniñ 4-nde yapılarnıñ qurğulanuvı vaqtında Keriç köprü demiryol qısmınıñ közü suvğa tüşti.
Keriç boğazındaki köpürniñ maşina qısmı mayısnıñ 16-nda yengil maşinalarğa açılğan edi. Köpürniñ demiryol qısmı soñuna qadar daa qurulmadı.
Ukraina prezidenti Petro Poroşenko, Rusiye işğal etken Qırımda Keriç köprüniñ qanunsız qurucılığı Kreml tarafından halqara uquq bozulğanınıñ daa bir delili ola, dep aytqan edi.
Avropa Birligi ve ABD Rusiye ve işğal altındaki Qırım arasında Keriç köprüniñ qısmen açılışını tenqit ettiler. Ukraina tarafı, 2014 senesi Qırım işğalinden soñ Rusiye ile köpür qurucılığana dair añlaşmadan çıqqan edi.
