Link açıqlığı

Saatnıñ esas haberi

BMT Rezolütsiya leyhasına qarşı çıqqan devletler belli oldı


BMT-nıñ azası olğan devletlerniñ 26-sı, Rusiye tarafından ilhaq etilgen Qırımda insan aqları vaziyeti boyunca BMT-nıñ yañartılğan rezolütsiya leyhasına qarşı çıqtı.

BMT-de Ukraina vekilligi haber etkeni kibi, vesiqağa qarşı rey bergenler bular: Ermenistan, Belorus, Boliviya, Burundi, Kamboca, Qıtay, Kuba, Şimaliy Koreya, Eritreya, Hindistan, İran, Qazaqstan, Qırğızstan, Myanma, Nikaragua, Rusiye, Sırbistan, Cenübiy Afrika Cumhuriyeti, Cenübiy Sudan, Sudan, Suriye, Tacikistan, Uganda, Özbekistan, Venesuela, Zimbabve.

Birleşken Milletler Baş Assambleyasınıñ üçünci komiteti cumaaqşamı künü, noyabrniñ 15-nde, «Qırım Muhtar Cumhuriyetinde ve Aqyarda insan aqları vaziyeti» qararınıñ yañartılğan leyhasını qabul etti. Rey berüvde 70 memleket vesiqağa «ebet» dedi, 26-sı qarşı çıqtı ve 82 memleket bitaraf oldı.

Bugünki rey berüvden soñ leyha BM Baş Assambleyasına baqması içün yollanacaq, anda ise bu sene dekabr ayında rey berilmesi beklenile.

2017 senesi dekabrniñ 19-nda BM Baş Assambleyası «Qırım Muhtar Cumhuriyeti ve Aqyar şeerinde insan aqları vaziyeti (Ukraina)» qararını qabul etken edi.

Vesiqada Rusiyeden BM Halqara mahkemesiniñ tevsiyelerini yerine ketirip, Qırımtatar Milliy Meclisiniñ yasağını lâğu etmesi ve yarımadada ukrain ve qırımtatar tillerinde tasilniñ temin etmesi talap etile.

XS
SM
MD
LG