Rusiyede İjevsk mektebindeki atış vaqtında elâk olğanlarnıñ sayısı 17 insanğa arttı, dep haber ete Udmurtiya yolbaşçısı ve ükümetiniñ matbuat hızmeti.
Bundan evel 15 kişi elâk oldı, dep haber etildi: 11-i bala, üç oca ve qaravul. 24 insan yaralandı, 22-si bala, üç yaralanğan balanıñ alı kritik.
Adise sebebinden Udmurtiyada sentâbrniñ 29-na qadar matem ilân etildi.
№88 İjevsk mektebindenn sentâbrniñ 26-nda saba atış oldı. Baza ve «112» bildirgenine köre, qara urbalı er kişi ateş açtı. Başta yanında vesiqaları yoq edi, şahsiyeti soñra belli oldı – bu mektep mezunı, 34 yaşında Artem Kazantsev.
Rusiye Federatsiyasınıñ Tahqiqat komiteti bildirgenine köre, er adamnıñ yanında eki büyük pıştav ve çoq patron bar edi: 9 mm kalibrli patronlarnen tahminen 10 oboyma. Rusiye Tahqiqat komitetiniñ malümatına köre, oboymalarda qırmızı boyanen «nefret» dep yazıldı. Er kişi başta qaravulğa ateş açtı, soñra sınıfqa kirip, balalarğa ateş açtı. Soñra özüni öldürdi.
№88 mektep İjevskniñ Puşkinskaya soqağında buluna, 982 talebe oquy, 80 oca çalışa, dep bildire tasil müessisesiniñ saytı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
