Ukrayına arbiyleri işğal altındaki Qırımnıñ Rusiye arbiy obyektlerine darbe endirmege devam etecektir. Bu aqta Amerika Cenkni tedqiqat institutınıñ (ISW) yañı esabatında aytıla.
ISW Qırımdaki patlavlar aqqında malümatnı izaatladı.
Talilcilerniñ qayd etkenine köre, Ukrayına Silâlı quvetleri Rusiye logistikasınıñ imkânlarını ve Dnipronıñ ğarbiy tarafında yardım etüv yollarını zayıflatmağa tırışa.
«Esabat azırlanğanda patlavlar Ukrayına ücümleri ya da istihbaratı, Rusiye arbiyleriniñ arbiy tehnikanı yañlış qullanuvı, Rusiyeniñ ava mudafaası ya da, Rusiye arbiyleri tüşüngeni kibi, Ukrayına ordusı irişemeycek rayonlarda ücümlerge azırlanğan açuvlı Rusiye imayecilerinen bağlımı belli degil», – dep aytıla ISW haberinde.
Keriç sakinleri Qırım.Aqiqatqa bildirgenine köre, avgustnıñ 18-nde aqşam patlavlarğa oşağan küçlü sesler eşitildi. Patlav sesleri aqqında «VKontakte» içtimaiy ağında Keriç saifelerinde de haber etildi. Qırımnıñ Rusiye yolbaşçısı Sergey Aksenovnıñ mesleatçısı Oleg Krüçkov Keriçte ava mudafaası çalıştı, dep bildirdi.
Aqşam üstü «Belbek» Rusiye arbiy uçaq alanında da patlavlar oldı. Aqyar ve yaqın olğan Bağçasaray rayonınıñ sakinleri «patlav ve atış sesleri» aqqında tarif etti. Olar «Belbek» arbiy aerodromından bir qaç kilometr mesafede yaşay.
Reuters agentligi yerli menbalarğa esaslanıp, Aqyardaki «Belbek» aerodromında eñ az dört patlav oldı, dep bildirdi.
Aqyarnıñ Rusiye yolbaşçısı Mihail Razvojayev «Belbekteki» adiseni Telegram kanalında tasdıqlap, «bir zarar yoq» ve «yaralanğanlar yoq», dep bildirdi. Razvojayev, «Belbek avalimanı rayonında ava mudafaa vastaları, ilk malümatqa köre, uçucısız cihaznı tüşündi», dep yazdı.
Avgustnıñ 16-nda saba işğal etilgen Qırımnıñ Canköy rayonında patlavlar oldı. Silâ anbarları, transformator alt stantsiyasında patlavlar ve demir yolnıñ zarar körgeni aqqında haber etildi.
Rusiye akimiyeti Canköy rayonınıñ Qalay köyünden 3 biñden çoq sakin tahliye etildi, dep bildirdi.
Daa evel berilgen malümatqa köre, Rusiye Mudafaa nazirligi Qırımnıñ şimalinde olğanlarnı «diversiya» dep adlandırdı. Qırımda cinaiy iş açıldı. Şübheli ya da tutulğanlar aqqında malümat berilmey.
Qırımnıñ Rusiye yolbaşçısınıñ mesleatçısı Oleg Krüçkov Qırımdaki patlavlarnı «terakt» dep adlandırdı.
The New York Times neşri yüksek rutbeli Ukrayına memurına atfı etip, işğal etilgen Qırımnıñ Canköy civarındaki patlavlarğa «elit ukrayin bölüginiñ» alâqası bar, dep bildirdi. Neşirniñ qayd etkenine köre, memur adı gizli olğanını istegen.
Avgustnıñ 9-nda Saq rayonınıñ Novofedirivka qasabasınıñ arbiy uçaq alanında patlavlar oldı. Rusiye akimiyeti «yaqın evlerden» tahminen 30 kişi tahliye etildi, dep bildirdi. 60-tan çoq mesken ev zarar kördi.
Rusiye Mudafaa nazirligi Novofedirivkada (Saq) arbiy uçaq alanında olğan patlavlarnıñ sebebi «bir qaç aviatsiya silâsınıñ detonatsiyası» oldı, dep bildire. «İnterfaks» Rusiye neşiri Rusiye Federatsiyasınıñ Mudafaa nazirligindeki menbasına esaslanıp haber etkenine köre, müessise patlavlarnıñ esas sebebi olaraq «yanğın telükesizligi qaideleriniñ bozuluvını» saya.
Ukrayına akimiyeti ve arbiyleri Rusiye işğal etken Qırımdaki patlavlardan mesüliyetini tanımadı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
