Qırımtatar faalleri Esmera Asanova, Mamure Çabanova, Zarife Yakupova ve Emine şerfe, IT-mütehassısı Pavlo Başinskıy başlağan, qırımtatarca online tercimeciniñ yaratılmasınen bağlı işni devam ete. Hızmet endi bir yıldan soñ çalışıp başlamaq mümkün.
Bunıñ aqqında Qırım.Aqiqatqa leyhanıñ iştirakçilerinden birisi, Emine şerfe haber etmekte.
“Şimdilik qırımtatarca bir qaç online luğat bar, amma bütün cümle ve metinni başqa bir tilden qırımtatar tiline, ve aksine - qırımtatar tilinden başqa tilge, çevire bilecek tercimeci yoq. Böyle hızmetniñ yaratıluvı tilniñ inkişafı ve tarqalmasına imkân berir, onıñ ögrenilmesini qolaylaştırır, qırımtatar tilinde edebiyat kölemini arttırmağa yardım eter ve daa çoq adamnıñ til añlamasını qolaylaştırır”, - dey faalci.
Onıñ aytqanına köre, bir qaç yıl devamında endi bayağı iş yapıldı, şimdilik ise er türlü mevzuda qırımtatar tilinde yazılğan ve başqa bir tilge tercime etilgen metinlerge ihtiyac bar.
“Tercimanlıqqa ve tercimeli edebiyatqa alâqası olğanlarğa büyük ricamız bar - yardım etiñiz. Kerek olsa, bizge berilgen metinler açıq irişimde olmacağını kefalet ete bilemiz, yani müelliflik aqqı bozulmaz”, - dep qayd ete Emine.
Al azırda faaller kopiyalanğan kitaplarnı elektron şekilge keçire, yañı malümat toplay ve grant destegini almaq içün leyha azırlay.
“Birleşip, semereli ve faal çalışsaq, endi bir yıldan tercimecini qullanmaq mümkün olur”, - dep işandırdı genç faal.
