Moskvadaki RF Yuqarı (temyiz) mahkemesi Rusiye tarafından Qırımğa alıp ketirilgen ve "casuslıqta" qabaatlanıp 10,5 yılğa apiske alınğan Herson faali İrına Ğorobtsovanıñ ükmüni deñiştirmedi. Bunı Qırımtatar Resurs Merkezine siyasiy mabüsniñ babası Volodımır Ğorobtsov bildirdi.
"O, bu titan divardır ve onı iç bir şey yıqıp olamazñ, dep yazdı", — babası İrınanıñ Rusiye Yuqarı (temyiz) mahkemesiniñ qararına reaktsiyası aqqında tarif etti.
Volodımırnıñ aytqanına köre, İrınanıñ sağlıq problemleri bar, cezahane şaraitleri ise sert. Qorantası mektüpler ve videolar vastasınen oña qol tutmağa tırışa
"O, bu koloniyada şaraitler pek sert olğanını yazdı. O yerde qadınlar qul kibi çalışmaqta. Aslında anda kürek cezası kibi. Ayat bir cehennem kibi: pek sert qaideler, ağır iş. Onıñ sıq-sıq yürek çarpıntısı ve baş ağrısı bar. Daa evel onıñ miyinde anevrizma tapılğan edi. Bu insultqa sebep ola bile", — dep tarif etti Vladimir.
İrına Ğorobtsova hersonlı aq qorçalayıcı ve cemaat faali. 2022 senesi saban ayında şeer Rusiye ordusı tarafından işğal etilgen soñ, o, tibbiy hadimlerge yardım etmege başladı. Qadın Rusiye Federatsiyasınıñ arbiyleri tarafından zorbalıqqa oğrağan yerli sakinlerge sağlıq saqlav aqqını yerine ketirüvde yardım ete edi. İçtimaiy ağlarda Ğorobtsova işğalge qarşı barışıq aktsiyaları ve şeerdeki yaşayış tecribesi aqqında tarif ete edi.
2022 senesi quralaynıñ 13-nde Ğorobtsovanıñ tuvğanları, ana-babasınen yaşağan evine saba "Z" işaretli eki maşna kelhenini haber etken edşiler. Rusiye arbiy urbasında bir qaç adam evge basıp kirgen ve qadınnı zornen maşnağa oturttıp alıp ketkenler.
2024 senesi saban ayında Rusiye Federatsiyası kontrol etken makeme Ğorobtsovnı casuslıq davasında 10 yıl 6 ayğa azatlıqtan marum etti.