Ukrayına Silâlı quvetleriniñ Baş ştabı noyabrniñ 15-nde saba cebedeki operativ vaziyet aqqında bildirdi.
"Keçken künü mudafaa quvetleriniñ bölükleri işğalcilerniñ ücümlerine mesken yerlerde qarşılıq kösterdi: Lugansk vilâyetiniñ Novoselovske; Donetsk vilâyetiniñ Beloğorivka, Bahmut, Bahmutske, Vremovka, Krasnoğorivka, Maryınka, Novokalınovo, Novomıhaylivka, Pervomayske", – dep aytıla haberde.
Ukrayına Silâlı quvetleriniñ malümatına köre, işğal etilgen Lugansk vilâyetinde Rusiye ordusı askerlerini yerleştirmek içün boş qalğan evlerni qıdıra.
Novoaydar mesken yerinde Rusiye zaptçıları qaldırılğan evlerni tapmaq içün yerli sakinlerden sahte "memuriyetke" kelmelerini talap ete", – dep tarif etti Ukrayına arbiyleri.
Berilgen malümatqa köre, Ukrayına aviatsiyası keçken künü Rusiye ordusına 21 darbe endirdi.
Rusiye tarafı zararlar aqqında bildirmey, cenk vaziyetinde malümatnı teşkermek imkânsız ola.
Amerika cenkni tedqiq etüv institutı (ISW) Hersonnıñ sağ tarafından ordu çıqarılğan son Rusiye Donetsk vilâyetindeki ücüm areketlerini quvetleştirecek, dep bildirdi. ISW, Ukrayına quvetleri Lugansk vilâyetinde sıñırlı ğalebe qazanmağa devam ete, Hersondaki ordular olarnı quvetleştirse, daa büyük zaferler qazanacaq, dep qoşa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
