Rusiye FSB-sı saba işğal etilgen Qırımda keçirilgen tintüvden soñ yaqalanğan ağa-qardan Cafer ve Alim Alüstayevni yibergen. Bunı "Qırım birdemligi" cemaat birleşmesi haber ete.
Uquq qoruyıcılarnıñ malümatına köre, saat 16:50 advokat FSB idaresine kirgen ve Alüstayevler aqqında malümatnıñ berilmesini istegen. Oña, olar sorğuda olğanlarını aytqanlar ve tışarıda toplanğan soy-sopnıñ dağılmasını istegenler.
Saat 18:45 FSB hadimleri ağa-qardaşnı yibergeni belli oldı.
"Binadan çıqardılar, maşnağa oturttılar, Aqmescitteki Kuybışevo tarafında qaldırdılar. Biz birden bizimkilerge telefon etip başaldıq. Anda bizni ballar qarşılap aldı", - dedi Cafer Alüstayev.
Bugün saba işğal etilgen Qırımnıñ İslâm Terek rayonında Rusiye Fedaral telükesizlik hızmetiniñ hadimleri qırımtatarlarnıñ evinde tintüv keçirgen. Bundan soñ ağa-qardaş Cafer ve Alim Alüstayevler yaqalanğan ve Aqmescitke FSB idaresine alıp ketilgen edi.
"Nomersiz üç arabanen keldiler. Maskalı insanlar qoradan atlap azbarğa keçtiler ve evni sarıp aldılar. Tintüv keçirdiler. Er şeyni alt-üst ettiler, bütün dolaplarnı baqıp çıqtılar, mağaznı, çardaqnı teşkerip çıqtılar. Qarar kibi bir şey qaldırmadılar. Cep telefonlarını tutıp aldılar. Eki ağa-qardaş 1990 senesi doğma Cafer ve 1998 senesi doğma Alim Alüstayevni alıp kettiler", - dep haber etti birleşmeniñ mühbiri.
Daa evel Qırımtatar resurs merkezinde bu yılnıñ ilk üç ayında Rusiye tarafından işğal etilgen Qırımda quvetçiler 49 kere qırımtatarlarnı yaqaladılar, dep haber etken ediler.
2022 senesi dekabr ayında yañartılğan BM Baş assambleyasınıñ Rusiye ilhaq etken Qırımda ve Aqyarda insan aqları vaziyeti qararında «Qırımda sebepsiz tutuvlar, Qırımğa ve Qırımdan zornen avuştıruv», hırsızlav, «filtratsiya tedbirleri» takbih etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
