Qurman "Hizb ut-Tahrir davasınıñ» iştirakçileri Rustem Emiruseinov, Arsen Abhairov ve Eskender Abdulganiyev, azat etilgen ukrain mabüslerni hayırladı. Bunı Qırım.Aqiqatqa advokat Nazim Şeyhmambetov aytıp berdi.
Onıñ aytqanına köre, bunı olar mahkeme oturışından soñ yaptılar; Rusiye nezaretindeki Aqmescitniñ Kiyev rayon mahkemecisi Denis Didenko, Emiruseinov, Abhairov ve Abdulganiyevniñ apis müddetini eki ayğa uzattı.
"Olar, mahkeme odasından ukrain mabüslerni serbestliklerinen hayırladı ve yaqın vaqıtta bütün siyasiy mabüsler azatlıqta qorantalarınen qavuşacağına ümüt etkenlerini ayttılar", – dedi advokat.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
