Avgust 2-sinde Kreml nezaretindeki Qırım Yuqarı mahkemesi, Bağçasaray "Hizb ut-Tahrir davası"nıñ üç iştirakçisi - Seyran Saliyev, Timur İbragimov, Ernes Ametovğa - apis müddetini bir ayğa uzattı. Bu aqta Facebook saifesinde "Qırım birdemligi" birleşmesi bildire. Mahkeme oturışı qapalı şekilde keçirildi.
"Advokat Mammet Mambetov, oturışnı açıq şekilde keçirmege ve mahkeme odasına diñleyicilerni yibermege muracaat etti. Bundan ğayrı, imaye tarafı, mahkemelengenniñ "akvarium"dan çıqarılmasını rica etti. Amma imayeniñ bütün muracaatları red etildi", - denile beyanatta.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
