Ukrayına prezidentiniñ ofis yolbaşçısı Andriy Yermaknıñ gece bildirgenine köre, Ukrayına 215 arbiyini Rusiye esirliginden qaytardı. Onıñ aytqanına köre, 108-i – «Azov» polkunıñ askerleri.
Onıñ aytqanına köre, Kyiv Moskvağa Rusiye prezidenti Vladimir Putinniñ kumı Viktor Medvedçuknı, umumen 55 rusiyeli esirni berdi.
«Denis Prokopenko «Redis», Serğiy Volınskıy «Volına», Svâtoslav Palamar, Denis Şlega, Oleg Homenko – «Azovstal» komandanları – telükesizlikte bulunalar. Ukrayına prezidenti Volodımır Zelenskıynıñ Türkiye prezidenti Recep Tayyip Erdoğan ile şahsiy añlaşmalarınıñ neticesidir. Rusiyeliler bizge olarnıñ ayatlarınen şantaj yapmağa istedi, amma olarğa böyle fırsat bermeycekmiz. Azat etilgenler arasında – Ukrayına içün cenkleşken ve ölümnen tehdit etilgen 10 çetel vatandaşı. Olar Er-Riyad şeerinde bulunalar. 200 qaramanımıznı Medvedçukqa deñiştirdik, o, tahqiqatqa bütün şaatlıqlarını berdi. «Azovstalniñ» beş qaraman komandanı 55 rusiyeli esirge deñiştirildi, olar bizge meraqlı degil», – dep tarif etti Yermak Facebookta.
Yermak esirlerni deñişüv bir qaç etapta ve farqlı yerlerde oldı, dep qayd etti.
«Qıyın bir esnas oldı… Qaramanlarımıznı evge qaytqanlarınen tebrikleyim. Olarğa bütün kerekli yardım kösterecekmiz – tibbiy, içtimaiy ve diger yardım. Olarnıñ qaytması – Ukrayına halqınıñ yararlığıdır. Er kesniñ ve er bir Ukrayına imayecisiniñ, olarnı qoruğan er kesniñ faziletidir», – dep qayd etti Ukrayına prezident ofisiniñ yolbaşçısı.
Esirlerniñ deñişüvi aqqında ilk haberler salı künü aqşam üstü peyda oldı. Azat etilgenler arasında Yekaterina Polişçuk, Mihail Dianov, 36-ncı brigadasınıñ üyken çavuşı (yaralı qol resminen belli), Mariupol patrul polisiniñ yolbaşçısı Mihail Verşinin, «Azovstal» fotoresimleriniñ müellifi Dmıtro Kazatskıy ve digerleriniñ adları bar edi.
Mayıs ayında Mariupolniñ bir qaç aylıq mudafaasından soñ bir qaç yüz Ukrayına askeri esir alındı.
İyülniñ 29-na keçer gecesi Donetsk vilâyetindeki Olenivka qasabasında tüzetüv koloniyasınıñ baraqlarından biri viran etildi. Eñ az 50 ukrayınalı esir elâk oldı. Ukrayına akimiyeti bildirgenine köre, Rusiye Ukrayınağa semereli silâ berilüvine keder etmek, Ukrayına quvetlerini qabaatlamaq ve itibardan tüşürmek içün ukrayınalı esirlerniñ kütleviy öldürilüvini teşkil etti.
Rusiye Mudafaa nazirligi apishanege Ukrayına arbiyleri HIMARSnen ücüm etti, dep ayttı. Ukrayına baş prokurorınıñ malümatına köre, binadaki patlavnıñ ilk sebebi raketa degil, termobarik silâ olğandır.
Türkiye prezidenti Recep Tayyip Erdoğan bu künleri Rusiye ve Ukrayına 200 arbiy esirniñ deñiştirilüvi aqqında añlaştı, dep bildirdi. O, deñişüv oldımı aytmadı ve diger tafsilâtlar bildirmedi.
Moskva iyünniñ soñunda Kyiv ile esirlerni deñişüv aqqında bildirgen edi. Zıddiyetniñ eki tarafı da «144-ke 144» formatında arbiylerni deñişti, dep tasdıqladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
